Малоритское благочиние



Службы

Служба преподобному и богоносному отцу нашего СТИЛИАНУ Пафлагонскому.

Творение Герасима из скита Малой Анны


Ноября 26 / 9 декабря

Память преподобного и богоносного отца нашего СТИЛИАНА Пафлагонского.

На вечерни.

На Господи воззвах ставим стихов 6 и поем стихиры святого на глас 4.

Подобны: Яко добля в мученицех.

Яко богоданная отрасль от чрева матере освятился еси, якоже Самуил божественный, отче преподобне, и Христу последовал еси совершенным разумом, от юности мудре, жительство равноангельное показавый; сего ради достойно прославился еси силою Духа, Стилиане всеблаженне.

Измлада тя Бог восприя, провидя жития твоего доброту; темже достойно просиял еси чистотою нравов и священными подвиги, добродетелей совершенством, якоже ангел, и постом усердным прославил еси чудес благодатию, Стилиане, тя прославльшаго.

Стяжаний богатство раздав нищим, бедность возлюбил еси разумом большим тя обогатившаго, преподобне, Христа Всецаря; богатством божественных дарований яко Того друг истинный, яко искусный исполнитель Того повелений, и непорочным жительством, Стилиане, просиявший.

Мира красоту всецело возненавидел еси, небесною любовию просиявый, и тела попечение совершенно отринул еси, в пещеру же, мудре, яко безплотный вселился еси, восходя к Богу степеньми святыми, и от рук божественного ангела хлеб принимал небесный.

Якоже столп богописанный божественного подвига и светлое Духа жилище, Стилиане всепетый, чудес приснотекущую благодать источаеши обильно и врачуеши болящих, изряднее же детей и младенцев исцеляеши болезни, скоро притекающих к покрову твоему.

Теплым предстательством твоим пребегающих к тебе, преподобне, покрый и избави от всякия скорби, носящим же божественное имя твое предстательствуй во всем, яко милосерд, и детем и младенцем подавай всегда силу, крепость и здравие, яко теплый тех предстатель, Стилиане богопрославленне.

Слава, глас 6.

Днесь явися светоносная память твоя, Стилиане богоносче, благочестивыя созывающая ко хвале и славе Христа Бога. Темже сию празднующе духовне, вопием ти: радуйся, от чрева матери освященный, яко славный Иеремия, и достойно звания тщание делы принесый; радуйся, добродетельной жизни образе и подвижнических исправлений ясное столпописание; радуйся, чудес источниче боготечный и детей младых заступниче теплейший. Молися Христу, молим тя отче, спастися душам нашим.

И ныне, Богородичен:

Кто Тебе не ублажит...

Вход. Свете тихий. Прокимен дне.

Чтения преподобническая.

На литии. Стихиры самогласны.

Глас 1.

Постнически поживши, в преподобии и истине Богу послужил еси, Стилиане богоносче; темже Пафлагония, отечество твое, пеленами твоими хвалится, и вся Церковь, твоих трудов победы и светлыя венцы видящи, вопиет ти: блажен еси, и добро ти будет, всеблаженне отче; Христос бо, Егоже возлюбил еси, дивно тя прослави, Иже подаяй Тобою нам велию милость.

Глас 2.

Ангельское житие преходя, в пустыню якоже Давид вселился еси, Стилиане богомудре; един бо Единому Богу служа и мужественным разумом беседуя, в пещере жилище сотворил еси, яко в палате исполненном света; и рукою ангела хлебом небесным питаяйся, ангельскими просиял еси дарованьми в служение, преподобне, пребегающих к твоей благодати.

Слава, глас 4.

Запечатлевшее тя звание деянием извествуяй, столп небеснаго сияния, якоже древле сыновом Израилевым в пустыни, Церкви Христовой показался еси, Стилиане блаженне; светом бо дел твоих иже во тьме и сени страстей спящия ко утру добродетелей возставляеши, и Егоже с высоты Востока - Христа Бога - молиши даровати просвещение душам нашим и велию милость.

И ныне, Богородичен.

От всех бед рабы Твоя сохраняй, благословенная Богородице, да Тя славим, надежду душ наших. На стиховне. Стихиры.

Глас 5. Подобен: Радуйся постнических

Радуйся, иже измлада Богу посвященный, яко Самуил божественный, и Сему благоугодивый, Стилиане чудне, твоего жительства сиянием; любови бо божественной последуя, преподобне от мирския прелести самаго себе удалил еси и яко безплотен в пустыни пожил еси; темже божественного Духа благодать воспрял еси, и помощник показался еси иже в нуждех и печалех, Христа моля даровати душам нашим велию милость.

Стих: Честна пред Господем смерть преподобных Его.

Хлеб с небесе дивно рукою ангела, яко равноангельный, преподобне, приявый божественным мановением, твою яже к Богу любовь всем показал еси и родство; тленных бо чувства всецело возгнушавыйся, нетленных и яже паче слова причастие сокровищствовал еси дарований благодати; темже от исполнения тех, молим тя, всем подавай капли, Стилиане всеблаженне, тя поющим и Христа славящим, тя прославльшаго.

Стих: Блажен муж бояйся Господа.

Радуйся, Пафлагонии отрасль, Церкви заре незаходимая, лучами преподобных дел и чудес светом озаряяй всю поднебесную; столпе одушевленный ведения и деяния, и воздержания истинный образ, и кротости и любви сокровищница; хранитель милостивейший детей же и младенцев, и новорожденных заступник и врач готовнейший; Христа моли душам нашим даровати велию милость.

Слава. Глас 8.

Мудрование плоти покоривый духу, якоже ангел на земли жительствовал еси, преподобне. О, твоих дарований, ихже от Бога сподобился еси! Не токмо бо хлеб небесный приял еси, но и чудес различных совершитель показался еси духом. И ныне, Стилиане блаженне, Спасу молися о душах наших.

И ныне. Богородичен.

Безневестная Дево, яже Бога неизреченно заченши плотию, Мати Бога вышняго, Твоих рабов мольбы приими, Всенепорочная, всем подающи очищение прегрешении. Ныне наша моления приемлющи, моли спастися всем нам.

Ныне отпущаеши. Трисвятое.

Тропарь, глас 3.

Столп одушевленный воздержания, столп же непоколебимый Церкве, Стилиане, показался еси, блаженне; измлада бо подвизался еси яко безплотный, детей и младенцев предстатель явился еси; отче преподобне, Христа Бога моли даровати нам велию милость.

Слава. Ин тропарь, глас 5.

Равноангельнаго жития измлада возжелал еси и Утешителя сосуд священный явился еси. Сего ради чудес дар и благодать исцелений изобильну источаеши, богоносче Стилиане, благочестно поющим ти: слава Давшему тебе крепость, слава тебе венчавшему, слава действующему тобою всем исцеления.

И ныне. Богородичен.

Гавриилу вещавшу Тебе, Дево, радуйся, ...

На утрени.

По 1-м стихословии Седален.

Глас 1.Подобен: Гроб Твой Спасе.

Богу измлада посвятился еси, богомудре, и Сего честная оправдания, отче, непорочне совершил еси жития светлостию; темже сожитель безплотных был еси, с ними же молися, Стилиане богоносче, о чтущих тя.

Богородичен.

Рождшая Христа Пребожественное Слово плотию, юже по нас, из кровей Твоих, Дево, непреложно паче смысла, ангельския чины превозшла еси неизреченною Твоею славою; Ты бо явилася еси Матерь всех Владыки и мира прибежище.

По 2-м стихословии Седален.

Глас 4. Подобен: Удивися Иосиф.

Удивишася твоим постническим трудом видящии тя, мудре, безплотных житие во плоти жительствовавшаго любовию святою; темже Христос тя возвеличи благодатию многою и божественными чудесы; и новорожденных и младенцев целебника, отче, миру показя тя. Егоже моли нам даровати, Стилиане, божественную милость.

Богородичен.

Удивляются твоему велелепию, Чистая, ангельския чины и славе велией, и яко Госпожу всех хвалят тя; низу же на земли человеков собори воспевают выну Твою благость и щедрот Твоих богатство, Всенепорочная; имиже от бед и скорбей непрестанно спасаеши, Богородительнице, прибегающих к покрову Твоему.

По полиелеи. Седален.

Глас 8. Подобен: Премудрость и Слово.

Бывшее ти богатство на земли раздавши нищим и убогим, разумом небесномудрым гласу последовал еси Живодавца Слова, и миру распялся еси, и безстрастия сосуд показался еси многоценный; темже страстей мрак разрешающи, подаеши исцеления верно притекающим к тебе, Стилиане всеблаженне. Молися Христу Богу прегрешений дати, отче, оставление празднующим любовию святую память твою.

Богородичен.

Бога заченшая преславно и рождшая, Дево, плотски, первозданнаго клятвы древния свободила еси, и спасения врата нам показалася еси, и к первой доброте, Чистая, воззвание; темже яко вину нашего спасения воспевающе Тя присно спасеннии рождеством Твоим, верно вопием Ти: радуйся, сокровищнице жизни, Богородице едина Приснодево; радуйся, миру Предстательнице и великое Прибежище.

1-й антифон 4-го гласа.

Прокимен: Честна пред Господем смерть преподобных Его.

Стих: Блажен муж бояйся Господа.

Евангелие от Луки, зач. 24 (6, 17-23).

Псалом 50.

Слава: Молитвами преподобнаго...

И ныне: Молитвами Богородицы...

И стихира Самогласна. Глас 6.

Житие по духу боголепно совершил еси и постническими труды прославил еси Господа славы, столп и утверждение благочестивых показался еси и скорбящих утешение известное; обаче, о Стилиане чудотворче, не престай предстательствующи о совершающих память твою.

Каноны Богородицы и святаго.

Канон святаго, егоже краегранесие: «Столп добродетелей, Стилиане, показался еси. Герасима».

Глас 8.

Песнь 1.

Ирмос: «Воду прошед».

Сопребывая со ангельскими вои, с ними моли Спаса, Стилиане, премудрость дати ми, словом воспевающему добродетелей твоих подвиги.

Ум свой устремил еси измлада всем сердцем к последней доброте, и к той питаяйся, отче, любовию, ангельски в мире просиял еси.

Освятил есть, отче, тя Бог от чрева матери, якоже божественного Самуила; темже освящения сосуд твоим святым житием показался еси.

Богородичен.

Светильник показалася еси позлащенный, рождшая вещественно Отчее сияние; темже страстей моих тьму твоими лучами, Дево, расточи.

Песнь 3.

Ирмос: «Ты еси утверждение».

Просияло житие твое, Стилиане всеблаженне, жемчугом добрых дел и верных облистало есть.

Все богатство твое нуждающимся раздал еси, истинное богатство сокровищствуя священными победами.

Теченьми слез твоих удобрив помышление, Стилиане, принесл еси богатно благоплодие небесное.

Богородичен.

Родила еси, Всенепорочная, без нетления плотски Творца, из тления древняго Адама избавльшаго.

Седален. Глас 3.

Мир оставил еси, божественною любовию, якоже безплотный в пустыню, Стилиане богоносе, вселился еси; от ангела же питавыйся, блаженне, ангельских дарований сподобился еси; темже молися даровати благохвалящим тя прегрешений оставление и велию милость.

Богородичен.

Бога родила еси несказанно и обожила еси человеческое естество безсеменным Твоим зачатием, Богоневесто; темже и мене страстьми бедствующа милосердием Твоим, молюся, избави, Дево Пречистая, Христа Бога просящи даровати веселие душам нашим.

Песнь 4.

Ирмос: «Услышах Господи».

За равноангельное житие твое Христос богатно, отче, воздал ти есть, благодать божественную подая тебе действовати всем исцеления.

Аще и в пещеру вселился еси, дом показался еси божественного Духа, самаго себе совершение удалил еси, преподобне, земныя всякия страсти.

Болезней детей целебника Христос тя, отче, показал есть; темже от всякия напасти сохраняй невредимы младенцы твоею благодатию.

Плоти всякое умертвил еси мудрование земное твоими подвиги, душу же твою украсил еси добродетелей красотою, отче преподобне.

Богородичен.

Души моея зной и телесе моего, Чистая, озлобление, яко благолюбивая, исцели, и прегрешений проси ми оставление.

Песнь 5.

Ирмос: «Утренююще вопием Ти».

Вознесши ум свой к небесным, Стилиане, яко странник и пришелец на земли пожил еси.

Светило стяжавши тебе незаходимое, радуется о тебе, Стилиане преподобне, Пафлагония чтущая тя.

Исцеления еще живый многия показал еси, и к Богу прешед, блаженне, чудодействуеши чтущим тя.

От всякия напасти избави, Стилиане, младенцы новорожденныя, яко тех еси хранитель спасительный.

Богородичен.

Храм божественный показалася еси пресветлый, Дево Чистая; темже и мене соделай сосуд честный деяний света.

Песнь 6.

Ирмос: «Ущедри мя Спасе».

Измлада добродетели делатель показался еси теплейший, Стилиане досточудне; сего ради сия увенча тя благодатей светлым венцем, яко Бога усерднаго служителя.

Премудро оставив яже в мире, богомудре, приял еси душею благодать Духа, и питаем был еси, преподобне, хлебом небесным чрез ангела яко равноангельный.

Силы божественныя совершая действом Духа, детей и младенцев исцеляеши болезни, и подаеши, преподобне, всем благочадие притекающим к покрову твоему.

Богородичен.

Родила еси плотию Пресущественнаго Господа, во двою убо естеству, единой же ипостаси, неизменно милостию; темже славу Твою, Богородице, величаем.

Кондак. Глас 4.

Освятивыйся от чрева матери, якоже божественный Самуил, богоносче, в подвизех прославил еси Христа Бога; темже исцелений показался еси приятелище и предстатель божественный детей и младенцев; Христос бо прославляет тя светло, Егоже измлада, Стилиане, прославил еси.

Икос.

Посвященный измлада Богу Благодетелю, якоже великий Креститель, того явился еси ревнитель и подражатель, и образ чистым твоим житием и добрыми нравы; якоже бо той, отче, в пустыни пожил еси, постом и бдением ум очистив, и непрестанною молитвою Господу соединивыйся; темже светом паче ума исполнился еси, и богодарованными благодатьми повсюду славен показался еси; изряднее же новорожденных детей и младенцев предстатель явился еси теплейший, и целебник болезней готовнейший; Христос бо прославляет тя светло, Егоже измлада, Стилиане, прославил еси.

Песнь 7.

Ирмос: «Отроки еврейския».

Управил еси, отче, житие твое от юности по закону Господню, к божественному зря званию вышнему, сего ради и сподобился еси благ вечных.

Благодать восприяв чудес, подаеши выну исцеления различныя болящим зельно и верою прибегающим, Стилиане отче наш, ко храму святому твоему.

Сокрушивый врага злодейства болезней твоих твердою крепостию, утверждение недвижимо и столп божественный показался еси колеблющимся, преподобне, житейскими обстояньми.

Взялся еси к высоте безстрастия подвигов ради и крайняго воздержания, и ангелом, премудре, уподобился еси, взывающи: благословен еси Господи, Боже во веки.

Богородичен.

Спаси мя, Едина Рождшая Преблагаго Бога и Царя, Богородице Чистая; к Тебе бо прибегаю, Твоего прося матерняго заступления.

Песнь 8.

Ирмос: «Царя Небеснаго».

Быв, отче, богоподобен в житии, паче ума яко ангел пожил еси; темже и ангелов собеседник показался еси.

Имеет раку мощей твоих, отче, яко сокровище божественное Пафлагония, от нея же всякое даяние полезное произрастает.

Здравие подаеши новорожденным младенцам, благочадие же безплодным, отче, и мир чтущим тя, Стилиане.

Богородичен.

Нескверная Дево, Бога Всенепорочная Матерь, всякаго избави мя тлетворнаго помышления, и к божественной любви воздвигни ум мой.

Песнь 9.

Ирмос: «Воистинну Богородицу».

Тесный совершивши путь, отче, в мире, в селениих божественных вселился еси, преподобне, в небесном царствии веселяся.

Исцеления источает, отче, гроб твой, Стилиане, раздаянием Духа, и злыя болезни престают всегда.

Во обители небесныя, отче, вселился еси, молися ко Господу, богосносче Стилиане, о совершающих божественную память твою.

Яко воню благоухания, яко божественный дар, от скверных устен моих приими, Стилиане богоносче, сию песнь мою.

Богородичен.

Пречистая Мария, Матерь Вышняго, от стрел Велиара свободи иже несумненным сердцем Тя величающих.

Ексапостиларий.

Стилиан великий да почтется песньми священными, монашествующих столпе и Церкви светило; чудес бо лучами вселенную озаряет.

Богородичен.

Богородительнице Дево, Всецарица Чистая, мира Предстательнице и спасение верных, покрый нас от всякаго зла и житейских обстояний.

На хвалитех ставим стихов 4 и поем стихиры:

Глас 1. Подобен: Небесных чинов.

Посвященный Господу, якоже славный Креститель, измлада, богомудре, всецелым помышлением преподобно и непорочно, Стилиане, житие твое скончал еси; и преизряден быв в болезнех подвижнических, сосуд явился еси божественнаго Духа.

Яже в пещере житие твое Христос Господь, Стилиане, прославляя, чрез ангела святаго пищу тебе посылает с небесе, яко верному служителю; действом чудес всей земли дивна тя, отче, показал есть.

Новорожденных и младенцев хранитель быв, от всякия напасти и злых болезней неврежденны дети сохраняй всегда, и благочадие подавай, Стилиане, прибегающим к покрову твоему.

Умными сиянии просвещаемый Троицы Святыя, всеблаженне отче, ходатайствуй непрестанно, Стилиане, за носящия имя твое, и подавай им богатно, яко милосерд, явления твоея благодати.

Слава. Глас 5.

Преподобие отче, стопам Христа последовав, достойно пожил еси, себе самаго отвергийся; ангел же явился еси во плоти, ангельскими добротами возвеличенный и боговидным подвигом извествуяй благодать. Темже столп и утверждение воистинну был еси Церкви Христовой, Стилиане блаженне, и предстатель наш ко Господу.

И ныне. Богородичен.

Блажим Тя, Богородице Дево, и славим Тя вернии по долгу, град непоколебимый, стену необоримую, твердую Предстательницу и прибежище душ наших.

На литургии служба вся преподобному.

Величание.

Столп добродетельныя жизни явился еси, Стилиане отче, преподобным твоим житием; темже младенцев предстатель показался еси и божественный заступник прославляющих тя.

Двоестишие.

Песнь священную, Стилиане всеблаженне, Герасим поет ти божественною любовию.

Перевод: игумен Иоасаф (Морза). Жировичи 26 ноября 2008 г.


Нужна Ваша помощь!:

Благотворительность:

Пожертвование на храм :