Малоритское благочиние



Службы

Святая блаженная Валентина Минская.

Служба святой (память 24 января / 6 февраля).


ВЕЛИКАЯ ВЕЧЕРНЯ

На «Господи, воззвах»: стихиры, глас 8-й:

Блаженная Валентино богомудрая, / чистая твоя душа, / еще с малых лет испытавшая сладость молитвы / пред Пречистым образом Богоматери, / и ныне предстоящи пред лицем Святыя Троицы, // испроси нам мир и велию милость. Блаженная мати Валентино, / восприявши болезнь от Бога / всех врачевала и утешала еси приходящих к тебе с мольбою. / Темже и нас не остави в напастех сущих от навет вражиих.

Глас 6-й:

Молитвенницу теплую видим тя, блаженная мати, / мнозем бо людем к тебе притекающим, / являеши в скорбех утешение, в недузех многоразличных исцеление, / в нуждах сущим и страждущим / присное вспоможение, // и доныне в чудодействии не оскудеваеши. Телесныя немощи побеждающи, / преуспевающи возрастом и премудростию, / созидающи в себе жилище Божие Духом, / сподобилася еси, мати Валентино, созерцати горний мир, // отонудуже и нам подаеши милость Божию.

Слава, глас тойже:

Селения святых наследовала еси, / блаженная мати Валентино, / во свете лица Божия, / зриши нужды с верою притекающих к тебе, / коемуждо потребная яже ко спасению подающи. / Сего ради и мы, / на помощь твою уповающе, просим: / моли Христа Бога, // спастися душам нашим.

И ныне, Богородичен, глас 6-й:«Кто Тебе не ублажит...» Вход. Прокимен дня и чтения 3 преподобническия.

На ЛИТИИ стихира храма, и со стиховны.

Стихиры на СТИХОВНЕ, глас 5-й:

Имущи сердце твое присно обращенное ко Господу, / исполнилася еси милости и сострадания, / к ищущим спасения и утешения. / Темже и ныне не престаеши благодетельствовати, / подающи молитвами твоими, мати Валентино, // потребная ко спасению.

Стих: Праведницы во веки живут, /и в Господе мзда их.

Достойно хвалима еси на земли, / целительнице немощствующих, богоблаженная Валентино, / яко и по кончине твоей усердно к тебе прибегающия / от недуг свобождаеши. / Темже непрестанно моли, спастися душам нашим.

Стих: Надеющиися Нань разумеют истину / и вернии в любви пребудут Ему.

Терпением житие твое украсившая, / и уды умертвившая победила еси вражия прилоги, блаженная. / Темже со всеми святыми славим, и торжествуем священную память твою, // просяще обрести молитвами твоими велию милость.

Слава, глас 6-й:

Еже о нас исполнив смотрение, / любовию земная с Небесными соединил еси, Господи, / сице глаголя: / идеже есмь Аз, тамо и слуга Мой будет. / Веруем, яко и служка Твоя Валентина, / во обителех святых молится, // о еже пребывати нам с Тобою, Господи.

и ныне. Богородичен глас тойже:

Земля неоранная явилася еси, / Мати Благословенная, / возрастившая нам Класс живота, / от Негоже всяк ядый не умирает, // якоже рече, Богородительнице, всех Питатель.

ТРОПАРЬ, глас 1-й:

От младенства восприявши веру Христову в сердце твое, / яко мудрая дева пронесла еси чрез все житие плоды ея, / темже и Христос дарова ти силу, / целити недуги немощствующих и колеблющихся. / Мы же, прославляюще тя, блаженная мати Валентино, вопием: / слава Давшему тебе крепость, / слава Прославльшему тя, // слава спасающему всех призывающих тя.

Слава и ныне: Богородичен

На УТРЕНИ

По 1-м стихословии СЕДАЛЕН, глас 6-й:

Терпением велиим житие твое украсивши и плоть духу покоривши, / победила еси вражия прилоги, / во смирении же и пощении Бога взыскавши, богоблаженная.

Слава, и ныне:

Молитвы рабы Твоея Валентины, прими, Богородице, / и избави нас от всяких бед, // яко родила еси Христа Спаса, Избавителя душ наших.

По 2-м стихословии СЕДАЛЕН, глас 8-й:

Приидите, вернии людие, днесь мати нашу Валентину благочестно восхвалим, / истинную угодницу Христову, / вражия козни поправшую, / ныне же со Ангелы ликовствующу и Христу непрестанно молящуюся, / и с любовию той возопиим: / не забуди нас, радосте наша, мати блаженная Валентино, // восхваляющих и чтущих священную память твою,

Слава, и ныне:

Призри на нас, недугующих, Всенепорочная, / и исцели болезни наша душевныя вкупе же и телесныя, // да возвеличим Тя, возвеличившую все человечество.

На полиелеи псалом избранный преподобных жен:

1. Блажени непорочнии в путь, ходящии в законе Господни.

2. Жива будет душа моя и восхвалит тя, и судьбы Твоя помогут мне.

Величание:

Величаем тя, / святая блаженная мати наша Валентино, / и чтим святую память твою, / ты бо молиши за нас // Христа Бога нашего.

По полиелеи седален, глас 4-й:

Чудна явилася еси в терпении твоем, / терпением и молитвою Христу угодила еси, блаженная Валентино, покоривши духу плотская мудрования, / и избрала еси добрая, еже Богу работати. / Сего ради Христос дарует благодать и милость молитвами твоими / чтущим любовию святую память твою.

Слава, и ныне, Богородичен:

Теплое заступление сущим в бедах, / и Помощницу нашу / Еюже от тли избавихомся, / Богородицу, вернии, всеусердно ублажаем.

Таже степенна, 1-й антифон 4-го гласа.

Прокимен, глас 4-й: Праведницы во веки живут, / и в Господе мзда их.

Стих: Надеющиися Нань разумеют истину и вернии в любви пребудут Ему.

Евангелие от Матфея, зачало 43.

По 50-м псалме СТИХИРА, глас 6-й:

Житие твое, яко солнце, / сердца верных озари, / и многия ко стези покаяния приведе. / Темже и нас светом невечерним просвети, / мати Валентино, // почитающих всечестную память твою.

КАНОН святыя,глас 8-й:

ПЕСНЬ 1-я.

Ирмос: Воду прошед яко сушу / и египетскаго зла избежав, / Израильтянин вопияше: / Избавителю и Богу нашему поим.

Боже Всещедрый, сподоби ны, недостойныя, принести молебное пение угоднице Твоей Валентине, / нашей ходатаице и молитвеннице пред Тобою.

Закон Божий имущи в сердце своем издетска, / уязвилася любовию ко Христу / и Тому истово в житии своем служила еси, мати блаженная.

И

збра тя Господь сосуд Духа Святаго в земли Минстей утешати страждущих и немощных, притекающих к стопам твоим. Богородичен: Архангельски песнь Тебе поем, Чистая: / радуйся, Обрадованная Марие, Мати Христа Бога, / присно молящаяся за род наш.

ПЕСНЬ 3-я.

Ирмос: Небеснаго круга Верхотворче, Господи, / и Церкве Зиждителю, / Ты мене утверди в любви Твоей, / желаний краю, верных утверждение, / Едине Человеколюбче.

Житием богоугодным и праведным освятилася еси, мати блаженная, / темже и нам, с верою к тебе прибегающим, / помози благодати Божия исполнитися.

Прозорливо усмотряя кончину воинов, / на поле брани убиенных, утешала еси вопрошавших тя. Жизнорадостно сретающи из разных градов и весей приходящих к тебе страждущих в болезнех, исцеляла их, блаженная Валентино.

Богородичен: Небеснаго Творца, Богородице Всепетая, рождши, / Небес пространнейшая явилася еси. / Нас от пространнаго пути погибельна уклоньши, / на Небесный путь настави, молюся.

Седален, глас 2-й:>

К тебе, блаженная мати Валентино, / яко сильной молитвеннице пред Богом, притекаем, / и просим исцеления недугом душевным и телесным, и вся потребная ко спасению.

Слава, и ныне, Богородичен:

Мати Пречистая, граде Божий, / избави люди Твоя от бед, / и помощь подаждь противитися врагом гордым, да вопием Ти: / радуйся, Благословенная.

ПЕСНЬ 4-я.

Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.

Сила Божия, в немощи совершающаяся, яви тя чудную помощницу, / целительницу недужных и немощных, делательницу молитвы, поющу: / слава силе Твоей, Господи.

Ум мой омраченный и страстьми телесными обуреваемый, / твоими молитвами, блаженная мати, просвети и утиши, / да выну воспою Господеви: / слава силе Твоей, Боже наш.

Недостойными усты приносимое тебе убогое хваление наше, не презри, блаженная, но приими / и воспевающих память твою молитвою посети / да воспоем Богу: / слава силе Твоей, Господи. Богородичен: Услыши, Пречистая Владычице, моления наша, / и избави нас от насилия вражия, / и глас Христов, призывающий благословенныя в Царство, услышати сподоби.

ПЕСНЬ 5-я.

Ирмос: Просветил нас повелении Твоими, Господи, и мышцею Твоею высокою Твой мир подаждь нам, Человеколюбие.

Просвети нас, о мати Валентино, надеждею и любовию ко Господу, / ныне бо зрящи Христа лицем к лицу, света неизреченнаго наслаждаешися, / Тому за ны молися.

Христос тя озари Своим светом неизреченным / в годину безбожную, / тем и яви тя яко столп огнен, светяй во тьме, блаженная мати.

Яко звезда многосветлая возсияла еси, блаженная мати, / указующи истинный путь на земном пути людем ищущим Правды Божией.

Богородичен: Свет рождшая божественный и Превечный, Богоневесто, / разреши мглу прегрешений наших.

ПЕСНЬ 6-я.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Призывающи имя Божие во спасение твое, / спасению многих послужила еси. / Да пребудем и мы в единении с Богом и в любви между собою, / молимтися, мати Валентино.

Молитвою Небесною и по кончине твоей от недуг свобождаеши, / целительнице наша безмездная, достойно хвалима еси на земли, / молися о душах наших.

Молитву нашу приими, мати Валентино, / да в умилении к честней иконе твоей припадем / и недугов душевных и страстей телесных исцеление скоро приимем.

Богородичен: Избавителя нашего неизреченно рождшая, Пресвятая Дево, / буди нам грешным прибежище спасения / и вечныя жизни Споручница.

Кондак, глас 5-й:

Ходатаицей за немощствующих явилася еси, / на земли Минстей, блаженная Валентино, / в скорбех, бедах и напастех всех верных утешающи, / прозревающи болезни и недуги приходящих к тебе, / просим же и мы недостойнии, / твоего предстательства пред Престолом Всевышняго, // даровати нам мир и спасение душ наших.

Икос:

На земли Минстей просияла еси, блаженная Валентино, / и вси притекающии к тебе в скорбех, бедах и напастех / обретают велие утешение, / приносяще свои просьбы и воздыхания сердечная, получают облегчение и исцеления. / Тем молим тя, мати наша, твоего непрестаннаго предстательства у престола Всевышняго во веки.

ПЕСНЬ 7-я.

Ирмос: От Иудеи дошедше, отроцы, / в Вавилоне иногда / верою Троическою пламень пещный попраша, поющее: / отцев Боже, благословен еси.

Возгореся нечестие на земли нашей, / веру отеческую в людех тщащееся попалити, / ты же, блаженная, приходящих к тебе научала еси верою воспевати: / отцев Боже, благословен еси.

Богопротивнии мучителие, от закона Божия отступльшии, / храмы разрушиша, но ты, блаженная Валентино, утешалаприходящих к тебе и подвигала еси пети: / отцев Боже, благословен еси.

Страждущим людем во дни нечестия молитвами твоими, / от злобожнаго языковредия неврежденным быти споспешествовала еси, научивши взывати: / отцев Боже, благословен еси.

Богородичен: Отроковице Дево, простри на нас милость Сына Твоего, / да кромешныя тьмы избавимся мольбами Твоими, поюще: / благословен еси, Господи Боже, во веки.

ПЕСНЬ 8-я.

Ирмос: Царя Небеснаго, / Егоже поют вои Ангельстии, / хвалите и превозносите во вся веки.

Победительница страстей явилася еси, Валентино, / всякая искушения вражия побеждающи и непрестанно поющи: благословите, вся дела Господня, Господа.

Царя Небеснаго измлада возлюбила еси, / и Тому до конца дний своих со усердием служила еси, блаженная. / Ныне же с лики ангельскими присно поеши: / благословите, вся дела Господня, Господа.

Мнози людие, пленении безбожием, / молитвами твоими, блаженная мати, на путь спасения наставила еси, / дабы в вереправей воспевали Богови: / благословите, вся дела Господня, Господа.

Богородичен: Победе во бранех духовных верным пособствуеши, Пресвятая Дево, / темже и всем к Тебе притекающим помощь

Твою низпосли, да выну поем: / благословите, вся дела Господня, Господа.

ПЕСНЬ 9-я.

Ирмос: Воистину Богородицу Тя исповедуем, спасении Тобою, Дево Чистая, со безплотными лики Тя величающее.

На одре болезни лежащи, / имела еси, Валентино, смирение, кротость, веру несумненну, надежду и любовь, яже к Богу, / и нас сего сподоби, да с тобою Христа присно величаем.

По гласу Божию: претерпевый до конца, той спасен будет, / ты, блаженная Валентино, исполнила еси закон Господа / и ныне во славе предстоиши и величаеши присно Господа.

Приими наше недостойное моление, Валентино блаженная, / и ходатайствуй пред Господем за всех чтущих тя, / да с тобою сподобимся в селениих райских славити Святую Троицу.

Богородичен: Мати Божия, Сияние Неизреченнаго Света, / стопы наша к жизни вечней направи, прощающи вся злая, нами содеянная.

Светилен:

Якоже солнце светоносно возсия ныне, блаженная мати Валентино, память твоя, / и озари землю Белорусскую светом неизреченным, / дабы вси вернии прославляли Великаго Бога Отца, и Сына, и Святаго Духа.

Слава, и ныне, Богородичен:

Державным Твоим покровом, Пречистая, / нас рабов Твоих, от наветов вражиих сохраняй всегда невредимы, / Тя бо едину стяжахом надежду и утверждение.

На ХВАЛИТЕХ стихиры, глас 8-й:

Приидите, вернии, / блаженную Валентину вси согласно восхвалим, / яже в житии своем / попечение изрядное о людях показа, / и ныне прибегающим к ней благодатная деяния являет, / таже в лице святых водворяющися, / престолу Божию присно предстоит // и молится о спасении душ наших.

В терпении страдания своя яко иго Христово светло пронесла еси, / блаженная мати, / и Христос тебе дарова дар недуги исцеляти // и спасати всех притекающих к молитвам твоим.

Присно в молитве пребывающи, / благодати Божия исполньшися, / многая люди недужныя телом, / здравы сотворила еси, / таже противу сил вражиих, / досаждающих душам человеческим, / воительница дерзновенная / воистину показалася еси, // Валентино блаженная.

Слава, глас 8-й:

Днесь край Минский, / просвещается, Валентино, твоими зарями, / и земля веселится цветы украшаема, / людие же Божии вопиют: / не престай молитися о всех, // празднующих любовию святую память твою.

И ныне, глас 8-й:

Владычице, / прими молитвы раб Твоих / и избави нас / от всякия нужды и печали.

Великое славословие, ектении и отпуст.

На Литургии ап. Галатам 213 зачало, ев. Луки 24 зачало.

Прокимен: «Честна пред Господем…»

МОЛИТВА СВЯТОЙ БЛАЖЕННОЙ ВАЛЕНТИНЕ МИНСКОЙ:

О, блаженная мати наша Валентино! Якоже и во дни земныя жизни твоея, с любовию принимала еси всех страждущих и немощствующих, всех в скорбех и болезнех сущих, и молитвами твоими целила недуги их. Такожде и ныне всем, с верою и умилением приходящим к тебе, у Господа исцеления испроси, наипаче же от падений греховных сохрани и на путь спасения настави. Услыши нас недостойных, блаженная Валентино, и принеси наша моления ко Престолу Всевышняго, да с радостию восхвалим Пресвятую Троицу: Отца и Сына и Святаго Духа, ныне и присно и во веки веков. Аминь.

Автор: stankovo.hram.by



Нужна Ваша помощь!:

Благотворительность:

Пожертвование на храм :